පින්සලෙන් ජීවිතය මවන සොඳුරු සිත්තරාවී…… පියුමි සකුන්තලා

        

සිරිමා බෝ සමිඳුන්ගේ සිලි සිලියෙන් ලැබුණු නිහඬබවත් නිහතමානීත්වයත්  ආභරණයක් කරගත් ඇය අනුරාධපුර තඹුත්තේගම උපත ලද පියුමි සකුන්තලා නම් විය∙ හේරත්හාමිගේ චන්දදාස පියාණන්ට හා ජයලත් ආරච්චිගේ ආරියවතී නම් මෑණියන්ට සිරිමා බෝ සමිඳු ඉදිරිපිට පැතූ තවත් පැතුමක් සඵල කරමින් ඇය එම පුංචි පවුලට එක්විය∙ වැඩිමහල් සොයුරියකගේ නැගනිය වීමත් නැගනියකගේ අක්කණ්ඩිය වීමත් ඇය ලැබූ භාග්‍යක්ම විය∙

       

           අතිශය දුෂ්කරත්වයෙන් පිරුණු පෙදෙසක උපත ලැබුවද ජීවිතයට නියතයක් ලෙස එම දුෂ්කරත්වය උරුමකරදීමට ඉඩ නොදීමට  ජීවිතය උගන්වන තම ගමේ තක්ෂලාව වන අ/මහබෙල්ලන්කඩවල මහා විද්‍යාලය වෙත පැමිණෙන්නේ ඉගෙනීමෙහි මූලික අත්පොත් තැබීමටය∙ එතැන් සිට වසර 13 ක් පුරාවටම එම පාසලේම ඉගෙනුම ලැබුවේ හෙට දිනයෙ මලක් වනු පිණිස කටු පොකුරු සිප ගනිමින්ය∙

     ඇයගේ 13 වසරක පාසල් කාලය වූ කලී ඇය තුළ සැගවී පැවති දක්ෂතා ඔප්නංවා ගැනීමට හමු වූ සුවිසල් ජීවන මංතලාව විය∙ වසර ගණනාවක් පුරාවට පංතියේ නායිකාව වෙමින් ද තවත් විටකදී තම වගකීම් නිසිලෙස ඉටු කරන ශිෂ්‍ය නායිකාවක් වෙමින් ද කටයුතු කළ ඇය විටෙක කීඩා අංශයෙන් තම කුසලතා විදහා දැක්වීය∙ඇලේ දොළේ කෙළි සෙල්ලම් කිරීමෙන් පන්නරය ලැබූ ඇය පාසලේ පිහිනුම් ශූරියක් ද විය∙

ඇය පාසල තුළ සියලුදෙනා හඳුනන චරිතයක් වූයේ සිත්තරාවියක වූ නිසාවෙන්මය∙ සහජයෙන්ම හිමි වූ ඉවසීමේ ගුණය නිසාවෙන්ම ඇය නොයෙක් රටා මවමින් දෙනෙත් මවිතයට පත් කරලීමට සමත් විය∙ පාසලට විවිධ වූ කීර්තීන් අත්කරදුන් ඇය පින්සල ජීවිතය කරගෙන ජීවත් විය∙

                   

        පාසලේ විවිධ සමිති සමාගම්වල සාමාජිකත්වය දරමින් පාසලෙහි නම රන්දමින් 13 වසරක ඉගෙනීමෙහි ඵල ගන්වන්නේ 2011 වසරේ පැවති අ∙පො∙ස∙ උසස්  පෙළ විභාගයෙන් විශිෂ්ට ලෙස සමත් වීමෙනි∙ සබරගමු සරසවියට පැමිණෙන ඇය තම පාසලේ අනෙකුත් සොයුරු සොයුරියන්ට පසක් කරදුන්නේ වානේ පන්නරය ලබන්නාක් මෙන් සියලු දුෂ්කරතා විඳගෙන ජීවිතය ජයගත් අයුරුයි∙ සරසවියේ සියලු මිතුරු මිතුරියන් අතර සෙනෙහබර මිතුරියක් වූ ඇය තම ජීවිතයේ හැරවුම් ලක්ෂය තීරණය කිරීමේ සාධක ලෙස සමාජ විද්‍යාව සහ සිංහල භාෂාව යන විෂයන් තෝරා  ගත්හ∙ සමාජ විද්‍යා විෂය තුළින් පුද්ගල ජීවිතය තුළ හමුවන විවිධාකාර වූ චරිතයන් මනා ලෙස හදුනා ගැනීමටත් සිංහල විෂය තුළින් සාහිත්‍යත් සංවේදීත්වයත් ජීවිතයට හුස්ම සේ ළංකර ගැනීමත් ඇයගේ අරමුණ විය∙ එමෙන්ම සිත්තම් කලාව මියදෙන්නට නොදී එය විනෝදාංශයක් ලෙස කරන ඇයගේ සිත්තම් දෙස වරක් දෙවරක් නොව කිහිප වරක් බැලීමට සිතෙන තරමටම අලංකාරය∙

සරසවිය තුළද තම හැකියාවන් ඔප්නංවාලීමට වෙර දරන ඇය විශ්ව විද්‍යාලයීය කැරම් කණ්ඩායමේ කැපීපෙනෙන දක්ෂතාවලින් යුත් තැනැත්තියකි∙ විශ්ව විද්‍යාලයීය අන්තර් පීඨ කැරමි තරගාවලියේ දී සමාජීය විද්‍යා හා භාෂා පීඨයට ජයඅත්කරදීමට සුවිශාල මෙහෙයක් කළ ඇය සමාජය තුළ ලොක්කෙකු නොව යහපත් පුරවැසියකු වීමට සිහින දකින්නීය∙

                                                                                                           

සටහන

චලනි දිලේෂා